試左文昌雞（order 左6件，佢黎左12件，淨Ｄ俾佢陰到），一件肉連火腿同肝一齊食，口感同味覺都唔錯，但好似無預期中既好。半打蝦餃。。。好搞笑，晚餐會有蝦餃依，但唔好食的，差過平時lunch 既酒樓囉。紫薑炒鴨肉，啖啖肉，正！但愛玲唔食紫薑。。。下次要睇清楚menu。仲有試左個文迷你東瓜”中”，當有啖湯都可以，唔知美心快餐果個好定佢好。。。。有機會要比較下。

總括黎講，呢間廣州酒家唔岩我地口味，唔係話難食，只係難有下一次囉。

食完飯行左一陣街食埋係上下九果間南信雙皮奶就回程返酒店，咩都無買呀，我同愛玲都唔係購物人士，只有食先有吸引力。。。。

食飽就去酒店攞房，今次經中旅book左５星級既東方賓館$480/night，本來用得賓館呢個名都感覺好舊，但其實佢08年先翻新過，仲要上市添，勁野！佢最有特色就係門口個牌坊同埋中庭既花園，但事實証明我地係唔洗住５星．．．因為根本要張床就得，到走個刻都冇參觀下酒店設施，真係同人講我地有入住過都冇人信！佢個位置其實唔錯，附近有個越秀公園，搭地鐵去到越秀公園站D1出口行２分鐘就到門口，佢同中國大酒店係鄰居，兩間酒店中間有24M記，實唔會餓死。

去到門口見到佢有個咩咩台灣商人慶典，見不斷都有人入去，本來以為同我地無關係，點知就出左事！！去check in 都好快手搞掂，點知一上房先知出事，原來係twins bed，即刻打返落frontdesk 要求轉double bed，結果講左好耐都係冇double bed，因為俾ｄ台灣佬book晒，個staff 話如果俾$200RMB可以upgrade，佢都知唔可能啦．．．不知所謂！最後唯有接受啦，對呢間野印象扣晒分。

愛玲冇大床瞓唔高興，坐係度睇日落都唔理我呀！ 

今次北上目的地係即將舉辦亞運既五羊城，亦都算係我半個鄉下，此行唯一見的就係食！出發前一晚先通知屋企人，愛玲仲要講左個大話．．．

星期六先去TKW陪愛玲食左老牛家早餐再過CWB打第３針，然後就返九龍坐東鐵去羅湖轉和諧號直上廣州。唔覺唔覺原來都要成１點鐘先去到深圳，所以預早係上水出一出閘買左兩件cake留返一陣上和諧號食，呢個搭車方法都算係最方便既上廣州架喇，好過坐直通巴或者深圳轉大巴，但係張車飛加左價喇，依家已經要$80人仔，之前係$75人仔，計返要成舊水港幣！睇黎遲下真係唔敢上去消費。

和諧號由深圳去廣州只係大約70分鐘，時速百幾公里都開得好穩定，上去瞓一覺就落車，祖國鐵路真係發展得唔錯，雖然價格唔低，但都好多人坐呀，希望快ｄ起好高鐵，咁就可以兩日一夜都再去遠少少玩。2點半到達廣州東站，今次醒左，搵到佢直去地鐵既出口，不過東站都幾舊下喇，好多設施都below standard，政府幾時先肯翻新下佢？！

因為未食lunch既關係，我地首先去搵野食填肚，出發前資料搜集搵到間”炳勝”，出名野有刺身、脆皮叉燒、豆腐。我地坐人山人海既廣州地鐵去石牌橋站（體育西轉1號線），點知我帶錯路去D出口．．．行左好多樓梯上到地面先知出事！好彩睇返一早預備好既offline map先識得去返B出口！一來一回又用多十幾分鐘。千辛萬苦黎到炳勝門口，一入去都知出事，基本上飯市已經過左．．．大部分坐係度吹水等埋單。食坐睇果本好大既menu，有唔少都想試下，但得兩個人唔食得多，所以市只打算食ｄ出名野，點知叫果樣冇果樣，ｄ廚師落晒場，冇晒mood啦！但一場黎到又肚餓，點都要食ｄ野，最後試左生魚木耳湯、靈芝肉粒山水豆腐、白灼墨魚仔。

睇佢唔出幾樣野都唔錯呀，個湯好多木耳（上左菜先知愛玲唔食），飲落鮮甜，ｄ生魚好彈牙；豆腐就有色但無靈芝味，不過真係好滑，同食豆腐花差唔多架；墨魚仔都好大碟，最搞野係佢果碟醬油原來已經加左wasabi，但愛玲話膽固醇高，唔食咁多，所以都係我食多。呢餐埋單$114人仔，其實唔平架，但係香港未必食到呢個質素囉。

21/1 1st Floor, Saladaeng Colonnade Condominium,Saladaeng Rd, Silom

http://www.zanottigroup.com 

電話：66 2 636-0002　（有心食就最好book定位，佢門口好多蚊，等位一定大出血！！）

Aubergine Restaurant, Bar & Terrace, Tel: (662) 234 2226

71/1 Saladaeng Road, Soi 1/1 (Map)

星期一至六：11:30 – 22:30 (星期日休息)當日係26/11，係細妹既生日，我地上午去完一個無下次景點（呵多哥街市）就搭BTS到SALA DAENG，由於地圖比例唔多好，而且佢本身位置都幾偏離大路，所以用左唔少時間（十幾分鐘）先搵到佢。去到已經一點幾，當地人lunch 時間都過左，我地係最後一台lunch 客（本來有另一對男女想入黎食，但入到門口又走左），餐廳除左我地外得另外一台自稱香港傳媒人既客。平民既我地當然係食set lunch ( 散叫好貴），一人一個4 course set, 490Bath ++位，其實佢地有3 course平100Bath ，但C/P當然係4 course 高啦！我地個set 有沙拉、餐酒（白／紅）、主菜、甜品同埋coffee/tea！每一道菜都睇得出十分精緻，由其係甜品同個湯可觀性十分高！點菜既時候侍應有問必答，大家用有限既英文對答都okay, 我地問佢其中一個湯係咩黎，佢竟然去廚房拎埋出黎俾我地睇！！阿Chief仲出過黎問我地Ｄ野食好唔好味，如果鍾意同鬼佬吹飲食都應該有排吹。

總扎括黎講，我呢個老土怪覺得味道唔特別。。。明顯呢Ｄ地方係食環境同感覺，所以我呢Ｄ鍾意大吸啖啖既人唔識欣賞。但睇得出呢間餐廳真係好野留黎架，值得一推！！

2008年黎完一次，今年亦決定再黎幫襯。食左燒大頭蝦，東陰公，飛天通菜，生蠔，咖哩炒蟹，生蝦。。。兩個人捧住個肚走。食既係香港廿年前既大排檔街邊風味，一餐飯時間已經有幾輪街頭叫化問你攞錢，接受唔到會食得唔開心。今次刻意影左幾版menu，因為感覺上價錢上升左，睇落已經接近siam區既中檔餐廳，如果再加價就唔會再食了。曼谷咁多特色餐館，既然都係搭的士先去到，點解唔去試下其他？

起身後都接近１０點，酒店無book早餐，只好自行搵食。其實book呢間酒店前已經知道附近有間開左幾十年既地道小食，出名係燒雞同燒豬頸肉。一間小店開得幾十年肯定自有原因，所以決定一試！小店裝修可用簡陋兩字形容，牆身貼有有不同時代既產物，感覺進入時光旅程。老板只識泰文，基本上係溝通不能，但幸好店內有香港雜誌剪報，落單基本上唔會有問題，而且作為遊客，都係食幾款大路菜色。當日可能時間較早，本來得我地一台客，係後期先多左另一台港客。老板落完單就去製作食物，進食區同煮食區分開，見到真係用炭燒，不過就係加熱而已。肉類食物都係先煮熟，有order再返燒上台。

• 燒雞 – 半隻都已經好大碟，雖然肉質算滑，但味道一般，要點大量雞醬先會好味。
• 燒豬頸肉 – 配有一碟香菜，但肉未燒夠，用炭火燒應有既香味欠奉。
• 木瓜蝦沙拉 –  汁調較好好，返而呢一咪最讚。
• Stick Rice (圖左上角) – 小竹簍原來入面係Stick Rice，幾香飯味。

如果要刻意黎食就唔好喇，住GCP / Courtyard就可以一試。

香港沒有分店，但日本已經有。只睇店名就知到同芒果有關，今次去曼谷一共光顧左兩次，分別係Soi 4 分店同CentralWorld分店，坦白講香港許留山都有咁上下質素，但Mango tango 令我印象最深反而係Soi 4 呢間分店既裝修，香港未見過有一間甜品店有佢咁有格調。睇得出係花左唔少心思，店名用得Mango當然係Mango 做logo，推開玻璃門入目係好高既樓底掛左唔少裝飾品，主要係以亮同簡潔為主，牆身鋪左木條油左好多 Mango塗鴉，地台亦係用木條鋪設，整體感覺係高當得黎有活力。但可能當晚客少，冷氣開得比較大，原本可以慢慢坐既感覺冇晒。

功略：先order 比$$，埋位等佢送上台。推薦Mango Sticky Rice，佢menu 冇圖中呢款（好彩細妹識得order），好似要留意下收銀位Ｄ 圖先有。

決定一試！曼谷人都幾搵得$$，一個set lunch 計返港幣約$6-70蚊，但好多人（日本人，本地人都有）食呀，等位未入得去就俾定menu問我地食咩餐，我地一人一個set, 我個豬抄扒set 加大左（其實唔洗加大，因為唔覺得件扒真係有大到囉！）平香港既人吉一半，但質素都有返8成架！芝麻醬都係自已磨，椰菜絲沙律，飯同湯都係任加，仲一客滑滑自製抹茶雪糕做甜品！正！鍾意食炸豬扒既朋友可以一試！