經過一翻努力令愛玲回復笑容，係時候又去食晚飯。坐地鐵去長壽站，目的地係上下九路既廣州酒家，途中見有好多段路都有為左亞運既城市美化工程做緊，廣州政府洗唔少錢！我地去到廣州酒家一開始話冇位，好彩問得兩問３樓岩岩有一台埋單，唔洗點等。但後尾先發現其實１，２樓好景Ｄ，下次一定要留意！

食飽就去酒店攞房，今次經中旅book左５星級既東方賓館$480/night，本來用得賓館呢個名都感覺好舊，但其實佢08年先翻新過，仲要上市添，勁野！佢最有特色就係門口個牌坊同埋中庭既花園，但事實証明我地係唔洗住５星．．．因為根本要張床就得，到走個刻都冇參觀下酒店設施，真係同人講我地有入住過都冇人信！佢個位置其實唔錯，附近有個越秀公園，搭地鐵去到越秀公園站D1出口行２分鐘就到門口，佢同中國大酒店係鄰居，兩間酒店中間有24M記，實唔會餓死。

28.8.2010

今次北上目的地係即將舉辦亞運既五羊城，亦都算係我半個鄉下，此行唯一見的就係食！出發前一晚先通知屋企人，愛玲仲要講左個大話．．．

星期六先去TKW陪愛玲食左老牛家早餐再過CWB打第３針，然後就返九龍坐東鐵去羅湖轉和諧號直上廣州。唔覺唔覺原來都要成１點鐘先去到深圳，所以預早係上水出一出閘買左兩件cake留返一陣上和諧號食，呢個搭車方法都算係最方便既上廣州架喇，好過坐直通巴或者深圳轉大巴，但係張車飛加左價喇，依家已經要$80人仔，之前係$75人仔，計返要成舊水港幣！睇黎遲下真係唔敢上去消費。