Project3501之拜四角

呢個project 原本預計下年年中先開波,點知早產,上星期四已經開始計時!

;

收到鎖匙後同預期一樣咁細,2個人住我可以接受。優點係全新地點住新單位開揚景觀租金便宜,缺點係交通不便及近垃圾房。由於唔急入伙,所以上幾日只係出動睇地板同櫃身顏色,家父係木工出身,佢又肯幫手diy,所以屋仔細細唔洗俾錢裝修公司賺喇,無縫地板、衣櫃,廚櫃都會由家父操刀,但設計唔好搵佢喇。為左天清晰表達我地既意見,尋晚帶左佢去ikea 睇櫃,希望出黎既同ikea有8成相似。

;

今日同佢上左去拜四角,阿媽執好晒一份份野叫我拎去搞,大致內容如下:

物品:雪梨5個、香一包、牙菜生豬肉5小包、祭品5set

過程:分別於屋的中央及4個角位放置牙菜生豬肉,雪梨(插香之用),然後由中央開始點香及燒祭品,祈求合家平安,家宅安寧。

;

拜完就同家父傾擺位同度尺,基本上會做廚房地櫃同吊櫃,廁所就會剩餘物資做個洗手盆櫃仔。由於鋪無縫地板,家父堅持要先油一層澀青作防水,所以今日既另一重點就係油澀青,去五金鋪買左一卡倫澀青同一支天拿手,將兩者溝埋就可以油落地,油完就直接離場。

拜四角油澀青

;

;

You may also like...